ਲਾਗ–ਇਨ/ਨਵਾਂ ਖਾਤਾ |
+
-
 
ਸਧਾਰ

ਸਧਾਰ : ਰਾਇ ਕੋਟ ਤੋਂ 20 ਕਿਲੋਮੀਟਰ ਉੱਤਰ ਵੱਲ ਸਥਿਤ ਲੁਧਿਆਣੇ ਜ਼ਿਲੇ ਦਾ ਪਿੰਡ ਹੈ। ਏਥੇ ਇਕ ਇਤਿਹਾਸਿਕ ਅਸਥਾਨ ਗੁਰਦੁਆਰਾ ਸ੍ਰੀ ਗੁਰੂ ਹਰਗੋਬਿੰਦ ਸਾਹਿਬ ਪਾਤਸ਼ਾਹੀ ਛੇਵੀਂ ਗੁਰੂ ਸਰ ਹੈ, ਜਿਹੜਾ “ਗੁਰੂ ਸਰ ਸਧਾਰ” ਦੇ ਨਾਂ ਨਾਲ ਪ੍ਰਸਿੱਧ ਹੈ। ਮਾਲਵਾ ਇਲਾਕੇ ਦੀ ਫੇਰੀ ਸਮੇਂ ਗੁਰੂ ਹਰਗੋਬਿੰਦ ਜੀ ਨੇ ਇਸ ਅਸਥਾਨ ਉਤੇ ਥੋੜ੍ਹਾ ਚਿਰ ਵਿਸ਼ਰਾਮ ਕੀਤਾ। ਸਥਾਨਿਕ ਪਰੰਪਰਾ ਅਨੁਸਾਰ ਕਾਂਗੜ ਪਿੰਡ ਦਾ ਰਾਇ ਜੋਧ ਗੁਰੂ ਸਾਹਿਬ ਨੂੰ ਇਸ ਅਸਥਾਨ ਤੇ ਮਿਲਿਆ ਭਾਵੇਂ ਕਿ ਕੁਝ ਇਤਿਹਾਸਿਕ ਵਰਨਨ ਇਹ ਭੇਂਟ ਭਾਈ ਰੂਪਾ ਦੇ ਅਸਥਾਨ ਤੇ ਹੋਈ ਮੰਨਦੇ ਹਨ। ਰਾਏ ਜੋਧ, ਸਖ਼ੀ ਸਰਵਰ ਦਾ ਮੁਰੀਦ ਸੀ , ਪਰ ਉਸ ਦੀ ਪਤਨੀ ਸਿੱਖ ਘਰਾਣੇ ‘ਚੋਂ ਸੀ। ਉਸ ਦੀ ਪ੍ਰੇਰਨਾ ਨਾਲ ਉਹ ਗੁਰੂ ਸਾਹਿਬ ਪਾਸ ਆਇਆ ਅਤੇ ਉਹਨਾਂ ਦਾ ਅਨਿੰਨ ਸਿੱਖ ਬਣ ਗਿਆ। ਏਸੇ ਤਰ੍ਹਾਂ ਇਹ ਵੀ ਮੰਨਿਆ ਜਾਂਦਾ ਹੈ ਕਿ ਸਧਾਰ ਪਿੰਡ ਵਿਚ ਹੀ ਕਾਬੁਲ ਦਾ ਕਰੋੜੀ ਨਾਂ ਦਾ ਇਕ ਅਮੀਰ ਘੋੜਿਆਂ ਦਾ ਵਪਾਰੀ ਗੁਰੂ ਸਾਹਿਬ ਨੂੰ ਮਿਲਿਆ ਅਤੇ ਉਸ ਨੇ ਦਸਿਆ ਕਿ ਦੋ ਅਤਿ ਸੁੰਦਰ ਤੇ ਵਧੀਆ ਨਸਲ ਦੇ ਘੋੜੇ ਜਿਹੜੇ ਉਹ ਕਾਬੁਲ ਤੋਂ ਗੁਰੂ ਜੀ ਨੂੰ ਭੇਂਟ ਕਰਨ ਲਈ ਲਿਆ ਰਿਹਾ ਸੀ ਉਹ ਲਾਹੌਰ ਦੇ ਮੁਗਲ ਹਾਕਮ ਨੇ ਉਸ ਪਾਸੋਂ ਜ਼ਬਰਦਸਤੀ ਖੋਹ ਲਏ ਹਨ। ਬਾਅਦ ਵਿਚ ਗੁਰੂ ਜੀ ਦੇ ਆਦੇਸ਼ ਤੇ ਭਾਈ ਬਿਧੀ ਚੰਦ ਨੇ ਇਕ ਇਕ ਕਰਕੇ ਉਹ ਦੋਵੇਂ ਘੋੜੇ ਮੁੜ ਹਾਸਲ ਕਰ ਲਏ।

    ਗੁਰੂ ਸਰ ਸਧਾਰ ਦੀ ਵਰਤਮਾਨ ਇਮਾਰਤ ਦੀ ਉਸਾਰੀ ਮਾਰਚ 1956 ਵਿਚ ਸ਼ੁਰੂ ਹੋਈ ਅਤੇ ਜੂਨ 1962 ਵਿਚ ਮੁਕੰਮਲ ਹੋਈ। ਗੁਰਦੁਆਰੇ ਦਾ ਹਾਲ ਕਮਰਾ ਆਇਤਾਕਾਰ ਹੈ, ਜਿਸ ਦੇ ਅਹਾਤੇ ਵਿਚ ਇਕ ਚੌਰਸ ਪ੍ਰਕਾਸ਼ ਅਸਥਾਨ ਹੈ ਜਿਸ ਦੇ ਉਪਰ ਗੁੰਬਦਦਾਰ ਕਮਰਾ ਹੈ। ਹਾਲ ਦੇ ਅੰਦਰ ਅਧ ਉਚਾਈ ‘ਤੇ ਇਕ ਗੈਲਰੀ ਹੈ। 1964 ਵਿਚ ਏਸੇ ਹਾਲ ਦੇ ਲਾਗੇ ਛੋਟਾ ਜਿਹਾ ਸਰੋਵਰ , “ਗੁਰੂ ਸਰ” ਬਣਾਇਆ ਗਿਆ। ਅੰਦਰ ਜਾਂਦਿਆਂ ਪੌੜੀਆਂ ਵਾਲੇ ਵਿਹੜੇ ਦੇ ਸੱਜੇ ਹੱਥ “ਗੁਰੂ ਕਾ ਲੰਗਰ” ਤੇ ਰਿਹਾਇਸ਼ੀ ਅਸਥਾਨ ਹਨ। ਖੱਬੇ ਹੱਥ ਖ਼ਾਲਸਾ ਹਾਇਰ ਸੈਕੰਡਰੀ ਸਕੂਲ ਅਤੇ ਖ਼ਾਲਸਾ ਕਾਲਜ ਆਫ਼ ਐਜੂਕੇਸ਼ਨ ਹੈ। ਗੁਰਦੁਆਰੇ ਦਾ ਪ੍ਰਬੰਧ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਸਥਾਨਿਕ ਕਮੇਟੀ ਰਾਹੀਂ ਚਲਾਇਆ ਜਾਂਦਾ ਹੈ।

    ਸਧਾਰ ਪਿੰਡ ਦੇ ਇਕ ਨਿੱਜੀ ਘਰ ਵਿਚ ਪਵਿੱਤਰ ਯਾਦਗਾਰ ਵਜੋਂ ਜੋੜਿਆਂ ਦੇ ਕੁਝ ਹਿੱਸੇ ਸਾਂਭੇ ਹੋਏ ਹਨ। ਕਿਹਾ ਜਾਂਦਾ ਹੈ ਕਿ ਗੁਰੂ ਹਰਗੋਬਿੰਦ ਸਾਹਿਬ ਨੇ ਨੰਗੇ ਪੈਰੀਂ ਚੱਲਣ ਵਾਲੇ ਇਕ ਸ਼ਰਧਾਲੂ ਭਾਈ ਜਵੰਦਾ ਦੀ ਸਮਰਪਣ ਭਾਵਨਾ ਨੂੰ ਵੇਖ ਕੇ ਇਕ ਜੋੜਾ ਉਸਨੂੰ ਪ੍ਰਦਾਨ ਕੀਤਾ। ਭਾਈ ਜਵੰਦਾ ਨੇ ਜੋੜਾ ਪਹਿਨਣ ਦੀ ਥਾਂ ਤੇ ਸਤਿਕਾਰ ਵਜੋਂ ਉਸ ਨੂੰ ਆਪਣੇ ਸਿਰ ਤੇ ਰੱਖ ਲਿਆ। ਪਵਿੱਤਰ ਯਾਦਗਾਰ ਵਜੋਂ ਉਸ ਦੀ ਸੰਤਾਨ ਨੇ ਉਸ ਬਖਸ਼ਸ਼ ਨੂੰ ਉਦੋਂ ਤਕ ਸੰਭਾਲੀ ਰੱਖਿਆ ਜਦੋਂ ਤਕ ਕਿਸੇ ਸਮੇਂ ਉਸ ਪਰਵਾਰ ਦੇ ਕਿਸੇ ਜੀਅ ਨੇ ਉਸਨੂੰ ਵਰਤ ਨਹੀਂ ਲਿਆ। ਪਰਵਾਰ ਦੇ ਬਜ਼ੁਰਗਾਂ ਨੇ ਇਸ ਬੇਅਦਬੀ ਭਰੇ ਕੰਮ ਤੋਂ ਨਾਰਾਜ਼ ਹੋ ਕੇ ਜੋੜੇ ਦੇ ਟੁੱਕੜੇ ਕਰ ਦਿੱਤੇ , ਤਾਂ ਜੋ ਮੁੜ ਹੋਰ ਕੋਈ ਉਸ ਨੂੰ ਵਰਤ ਨਾ ਸਕੇ

ਲੇਖਕ : ਮ.ਗ.ਸ. ਅਤੇ ਅਨੁ. ਹ.ਸ.ਕ.,     ਸਰੋਤ : ਸਿੱਖ ਧਰਮ ਵਿਸ਼ਵਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।,     ਹੁਣ ਤੱਕ ਵੇਖਿਆ ਗਿਆ : 1061,     ਪੰਜਾਬੀ ਪੀਡੀਆ ਤੇ ਪ੍ਰਕਾਸ਼ਤ ਮਿਤੀ : 3/11/2015 12:00:00 AM
ਹਵਾਲੇ/ਟਿੱਪਣੀਆਂ:

1.     ਨਰੋਤਮ, ਤਾਰਾ ਸਿੰਘ, ਸ੍ਰੀ ਗੁਰ ਤੀਰਥ ਸੰਗ੍ਰਹਿ, ਕਨਖਲ, 1975

2.     ਗਿਆਨ ਸਿੰਘ, ਗਿਆਨੀ, ਤਵਾਰੀਖ਼ ਗੁਰਦੁਆਰਿਆਂ, ਅੰਮ੍ਰਿਤਸਰ, ਮ.ਨ.

3.     ਠਾਕਰ ਸਿੰਘ, ਗਿਆਨੀ, ਸ੍ਰੀ ਗੁਰਦੁਆਰੇ ਦਰਸ਼ਨ, ਅੰਮ੍ਰਿਤਸਰ, 1923


ਸਧਾਰੇ

ਸਧਾਰੇ (ਗੁ.। ੧. ਸੰਸਕ੍ਰਿਤ ਸ਼ੋਧਨੰ=ਸੰਵਾਰਨਾ। ਪੰਜਾਬੀ ਸੁਧਾਰਨਾ= ਸੰਵਾਰਨਾ।

੨. ਸੰਸਕ੍ਰਿਤ ਸ+ਆਧਾਰ) ੧. ਸਵਾਰਨ ਹਾਰੇ। ੨. ਸਹਿਤ ਆਧਾਰ ਕਰਨਹਾਰੇ। ਯਥਾ-‘ਬਰਸੁ ਪਿਆਰੇ ਮਨਹਿ ਸਧਾਰੇ’ ਹੇ ਪਿਆਰੇ ਮਨ ਨੂੰ ਸਵਾਰਨ ਵਾਲੇ (ਸਤਿਗੁਰੋ! ਸ਼ਬਦ ਰੂਪ ਅੰਮ੍ਰਿਤ ਦੀ) ਵਰਖਾ ਕਰੋ

ਲੇਖਕ : ਮੁਖ ਸੰਪਾਦਕ ਡਾ. ਹਰਭਜਨ ਸਿੰਘ ਸੰ. ਕੁਲਵਿੰਦਰ ਸਿੰਘ ਅਤੇ ਮੁਹੱਬਤ ਸਿੰਘ,     ਸਰੋਤ : ਸ਼੍ਰੀ ਗੁਰੂ ਗ੍ਰੰਥ ਕੋਸ਼ (ਸ਼੍ਰੀਮਹਿਤ ਪੰਡਿਤ ਗਿਆਨੀ ਹਜ਼ਾਰਾ ਸਿੰਘ ਕ੍ਰਿਤ), ਡਾ. ਬਲਬੀਰ ਸਿੰਘ ਸਾਹਿਤ ਕੇਂਦਰ, ਦੇਹਰਾਦੂਨ, ਪੰਜਾਬੀ ਯੂਨੀਵਰਸਿਟੀ,     ਹੁਣ ਤੱਕ ਵੇਖਿਆ ਗਿਆ : 1061,     ਪੰਜਾਬੀ ਪੀਡੀਆ ਤੇ ਪ੍ਰਕਾਸ਼ਤ ਮਿਤੀ : 3/12/2015 12:00:00 AM
ਹਵਾਲੇ/ਟਿੱਪਣੀਆਂ: noreference

ਸਧਾਰ

ਧਾਰ. ਸ—ਆਧਾਰ. ਆਧਾਰ ਸਹਿਤ. “ਬਰਸੁ ਪਿਆਰੇ ਮਨਹਿ ਸਧਾਰੇ.” (ਮਲਾ ਮ: ੫) ਪ੍ਰਸੰਨ (ਖ਼ੁਸ਼) ਕਰਨ ਵਾਲੇ । ੨ ਜਿਲਾ ਲੁਦਿਆਨਾ ਦੀ ਤਸੀਲ ਜਗਰਾਉਂ ਦਾ ਇੱਕ ਪਿੰਡ , ਜੋ ਰੇਲਵੇ ਸਟੇਸ਼ਨ ਮੁੱਲਾਪੁਰ ਤੋਂ ਦੱਖਣ ਪੰਜ ਮੀਲ ਦੇ ਕਰੀਬ ਹੈ. ਇਸ ਪਿੰਡ ਤੋਂ ਅੱਧ ਮੀਲ ਉੱਤਰ ਸ਼੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦਾ ਗੁਰੁਦ੍ਵਾਰਾ ਹੈ, ਜਿਸ ਦੀ ਸੰਗ੍ਯਾ “ਗੁਰੂਸਰ” ਭੀ ਹੈ. ਗੁਰੁਦ੍ਵਾਰੇ ਨਾਲ ੨੦ ਵਿੱਘੇ ਜ਼ਮੀਨ ਹੈ. ਹਰ ਪੂਰਣਮਾਸੀ ਨੂੰ ਜੋੜ ਮੇਲ ਹੁੰਦਾ ਹੈ. ਇਸ ਪਿੰਡ ਦੇ ਪੰਚਾਇਤੀ ਡੇਰੇ ਵਿੱਚ ਸ਼੍ਰੀ ਗੁਰੂ ਹਰਿਗੋਬਿੰਦ ਸਾਹਿਬ ਜੀ ਦਾ ਜੋੜਾ ਹੈ, ਜੋ ਸਤਿਗੁਰੂ ਨੇ ਪ੍ਰੇਮੇ ਸਿੱਖ ਨੂੰ ਬਖ਼ਸ਼ਿਆ ਸੀ.

ਲੇਖਕ : ਭਾਈ ਕਾਨ੍ਹ ਸਿੰਘ ਨਾਭਾ,     ਸਰੋਤ : ਗੁਰੁਸ਼ਬਦ ਰਤਨਾਕਾਰ ਮਹਾਨ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।,     ਹੁਣ ਤੱਕ ਵੇਖਿਆ ਗਿਆ : 1087,     ਪੰਜਾਬੀ ਪੀਡੀਆ ਤੇ ਪ੍ਰਕਾਸ਼ਤ ਮਿਤੀ : 10/1/2014 12:00:00 AM
ਹਵਾਲੇ/ਟਿੱਪਣੀਆਂ: noreference

ਸੁਧਾਰ

ਸੁਧਾਰ. ਸੰਗ੍ਯਾ—ਸਮੁੱਧਾਰ. ਦੁਰੁਸ੍ਤੀ. ਸੁਧਾਰਨਾ। ੨ ਸ਼ੁੱਧ ਆਚਾਰ ਦਾ ਸੰਖੇਪ। ੩ ਵਿ—ਉੱਤਮ ਹੈ ਜਿਸ ਦੀ ਧਾਰਾ , ਐਸਾ ਸ਼ਸਤ੍ਰ. ਤਿੱਖਾ ਸ਼ਸਤ੍ਰ.

ਲੇਖਕ : ਭਾਈ ਕਾਨ੍ਹ ਸਿੰਘ ਨਾਭਾ,     ਸਰੋਤ : ਗੁਰੁਸ਼ਬਦ ਰਤਨਾਕਾਰ ਮਹਾਨ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।,     ਹੁਣ ਤੱਕ ਵੇਖਿਆ ਗਿਆ : 1113,     ਪੰਜਾਬੀ ਪੀਡੀਆ ਤੇ ਪ੍ਰਕਾਸ਼ਤ ਮਿਤੀ : 10/10/2014 12:00:00 AM
ਹਵਾਲੇ/ਟਿੱਪਣੀਆਂ: noreference

ਸੁਧਾਰ

ਸੁਧਾਰ [ਨਾਂਪੁ] ਸੋਧ, ਦਰੁਸਤੀ, ਤਰਮੀਮ, ਪਰਿਵਰਤਨ , ਤਬਦੀਲੀ

ਲੇਖਕ : ਡਾ. ਜੋਗਾ ਸਿੰਘ (ਸੰਪ.),     ਸਰੋਤ : ਪੰਜਾਬੀ ਯੂਨੀਵਰਸਿਟੀ ਪੰਜਾਬੀ ਕੋਸ਼ (ਸਕੂਲ ਪੱਧਰ), ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।,     ਹੁਣ ਤੱਕ ਵੇਖਿਆ ਗਿਆ : 1180,     ਪੰਜਾਬੀ ਪੀਡੀਆ ਤੇ ਪ੍ਰਕਾਸ਼ਤ ਮਿਤੀ : 2/24/2014 12:00:00 AM
ਹਵਾਲੇ/ਟਿੱਪਣੀਆਂ: noreference

ਵਿਚਾਰ / ਸੁਝਾਅ