ਸੂਤ ਸਰੋਤ : ਪੰਜਾਬੀ ਸਭਿਆਚਾਰ ਸ਼ਬਦਾਵਲੀ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਤ (ਨਾਂ,ਪੁ) ਕੱਪੜਾ ਬੁਣਨ ਲਈ ਰੂੰਈਂ ਕੱਤ ਕੇ ਬਣਾਇਆ ਧਾਗਾ

ਸੂਤ ਸਰੋਤ : ਪੰਜਾਬੀ ਯੂਨੀਵਰਸਿਟੀ ਪੰਜਾਬੀ ਕੋਸ਼ (ਸਕੂਲ ਪੱਧਰ), ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਤ [ਵਿਸ਼ੇ] ਠੀਕ-ਠਾਕ, ਸੂਤਰ, ਫਿਟ, ਸੰਵਰਿਆ ਹੋਇਆ [ਨਾਂਪੁ] ਸੂਤਰ, ਧਾਗਾ

ਸੂਤ ਸਰੋਤ : ਗੁਰੁਸ਼ਬਦ ਰਤਨਾਕਾਰ ਮਹਾਨ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਤ. ਸੰ. ਸੂਤ੍ਰ. ਸੰਗ੍ਯਾ—ਤਾਗਾ. ਡੋਰਾ. “ਦਇਆ ਕਪਾਹ ਸੰਤੋਖ ਸੂਤ.” (ਵਾਰ ਆਸਾ) ੨ ਜਨੇਊ. “ਸੂਤ ਪਾਇ ਕਰੇ ਬੁਰਿਆਈ.” (ਮ: ੧ ਵਾਰ ਰਾਮ ੧) ੩ ਪ੍ਰਬੰਧ. ਇੰਤਜਾਮ। ੪ ਪਰਸਪਰ ਪ੍ਰੇਮ. ਮੇਲ ਮਿਲਾਪ. “ਰਾਖਹੁ ਸੂਤ ਇਹੀ ਬਨ ਆਵੈ.” (ਗੁਪ੍ਰਸੂ) ੫ ਰੀਤਿ. ਰਿਵਾਜ. “ਹੁਤੋ ਸੰਸਾਰ ਸੂਤ ਇਹੁ ਦਾਸਾ.” (ਨਾਪ੍ਰ) ਸੰਸਾਰ ਰੀਤਿ ਅਨੁਸਾਰ ਇਹ ਸੇਵਕ ਸੀ। ੬ ਠੀਕ. ਸਹੀ. ਦੁਰੁਸ੍ਤ. “ਮੰਦਲ ਨ ਬਾਜੈ ਨਟਪੈ ਸੂਤਾ.” (ਆਸਾ ਕਬੀਰ) ੭ ਸੂਤ੍ਰ ਆਕਾਰ ਦੀ ਮਿਠਾਈ ਜੋ ਖੰਡ ਵਿੱਚ ਪਾਗੀ ਜਾਂਦੀ ਹੈ. ਸੇਵੀ. ਨੁਗਦੀ. “ਲਡੂਆ ਅਰ ਸੂਤ ਭਲੇ ਜੁ ਬਨੇ.” (ਕ੍ਰਿਸਨਾਵ) ੮ ਸੰ. सूत. ਰਥਵਾਨ. ਰਥ ਹੱਕਣ ਵਾਲਾ. “ਪਾਰਥ ਸੂਤ ਕੀ ਡੋਰ ਲਗਾਏ.” (ਕ੍ਰਿਸਨਾਵ) ਅਰਜੁਨ ਨੇ ਰਥਵਾਨ ਦੀ ਡੋਰ ਕ੍ਰਿਸਨ ਜੀ ਨੂੰ ਫੜਾਈ। ੯ ਸੂਰਜ । ੧੦ ਅੱਕ । ੧੧ ਬ੍ਰਾਹਮਣੀ ਦੇ ਪੇਟ ਤੋਂ ਛਤ੍ਰੀ ਦਾ ਪੁਤ੍ਰ. ਦੇਖੋ, ਔਸ਼ਨਸੀ ਸਿਮ੍ਰਿਤਿ ਸ: ੨ ਅਤੇ ੩। ੧੨ ਬੰਦੀਜਨ. ਦੇਵਤਾ ਰਾਜਾ ਰਿਖੀ ਆਦਿ ਦੀ ਵੰਸ਼ਾਵਲੀ ਚੇਤੇ ਰੱਖਣ ਅਰ ਪੜ੍ਹਨ ਵਾਲਾ ਕਵਿ1। ੧੩ ਪਾਰਾ । ੧੪ ਵ੍ਯਾਸ ਦਾ ਚੇਲਾ , ਲੋਮਹਰ੄ਣ, ਜੋ ਰਿਖੀਆਂ ਨੂੰ ਪੁਰਾਣਕਥਾ ਸੁਣਾਇਆ ਕਰਦਾ ਸੀ। ੧੫ ਵਿ—ਪ੍ਰਸੂਤ. ਸੂਇਆ ਹੋਇਆ. ੧੬ ਚੁਆਇਆ ਹੋਇਆ. ਟਪਕਾਇਆ ਹੋਇਆ। ੧੭ ਸੰ. सूत्त-ਸੂੱਤ. ਦਿੱਤਾ ਹੋਇਆ. ਦਾਨ ਕੀਤਾ. ਦੇਖੋ, ਸਾਤ ਸੂਤ ੨. ੧੮ ਤੁ. ਰਾਗ ਦੇ ਸੁਰਾਂ ਦਾ ਪ੍ਰਬੰਧ. ਠਾਟ.

ਸੂਤ ਸਰੋਤ : ਪੰਜਾਬੀ ਕੋਸ਼ ਜਿਲਦ ਪਹਿਲੀ (ੳ ਤੋਂ ਕ)

ਸੂਤ, ਪੁਲਿੰਗ : ੧. ਸੁਤਰ, ਧਾਗਾ, ਤਾਗਾ; ੨. ਵੱਟਿਆ ਹੋਇਆ ਧਾਗਾ ਜਿਸ ਨਾਲ ਰਾਜ ਸੇਧ ਵੇਖਦੇ ਜਾਂ ਜਿਸ ਨਾਲ ਤਰਖਾਣ ਨਿਸ਼ਾਨ ਲਾਉਂਦੇ ਹਨ; ੩.  ਮੱਕੀ ਦੀ ਛੱਲੀ ਦੇ ਸਿਰ ਤੇ ਨਿਕਲੇ ਵਾਲ; ੪. ਇੰਚ ਦਾ ਚੋਥਾ ਹਿੱਸਾ, ਤੱਸੂ, ਬਹੁਤ ਕਮ ਮਿਣਤੀ (ਸੂਤ ਕੁ, ਸੂਤ ਭਰ), ੫. ਪੁਲਿੰਗ : ਜਨੇਊ (ਸੂਤ ਪਾਇ ਕਰੇ ਬੁਰਿਆਈ); ੬. ਪ੍ਰਬੰਧ, ਇੰਤਜ਼ਾਮ, ੭. ਪਰਸਪਰ ਪ੍ਰੇਮ, ਮੇਲ ਮਿਲਾਪ, ਸਲੂਕ, ਮੀਜਾ, ਰਲੀ ਮਰਜ਼ੀ, ਸੁਲ੍ਹਾ (ਲਾਗੂ ਕਿਰਿਆ : ਹੋਣਾ, ਕਰਨਾ, ਬੱਝਣਾ); ੮. ਰੀਤ, ਰਿਵਾਜ, ਮਰਯਾਦਾ, ਸੰਜਮ 'ਹੁਤੋ ਸੰਸਾਰ ਸੂਤ ਇਹ ਦਾਸਾ'; ੯. ਸੂਤ੍ਰ ਆਕਾਰ ਦੀ ਮਠਿਆਈ ਜੋ ਖੰਡ ਵਿੱਚ ਪਾਈ ਜਾਂਦੀ ਹੈ, ਸੇਂਵੀਂ, ਨੁਗਦੀ (ਲਡੂਆਂ ਅਰ ਸੂਤਭਲੇ ਜੁ ਬਨੇ); ੧੦. ਪਤਾਲੂ, ਨਲ; ੧੧.  ਠੀਕ, ਦਰੁਸਤ, ਫਿੱਟ; ੧੨. ਕਿਰਿਆ ਵਿਸ਼ੇਸ਼ਣ :  ਰੁਕ ਸਿਰ, ਰੁਖ ਸਿਰ

–ਸੂਤ ਉਤਰਨੇ, ਮੁਹਾਵਰਾ : ਨਲ ਜਾਂ ਪਤਾਲੂ ਉਤਰਨੇ

–ਸੂਤ ਆਉਣਾ, ਮੁਹਾਵਰਾ : ਠੀਕ ਹੋਣਾ, ਲੋਟ ਆਉਣਾ

–ਸੂਤ ਹੋਣਾ, ਮੁਹਾਵਰਾ : ਠੀਕ ਆਉਣਾ, ਸਿੱਧੇ ਹੋਣਾ, ਸੁਧਰਨਾ

–ਸੂਤ ਕਰਨਾ, ਮੁਹਾਵਰਾ : ਠੀਕ ਕਰਨਾ, ਰੁੱਖ ਸਿਰ ਕਰਨਾ, ਥਾਂ ਸਿਰ ਕਰਨਾ, ਸੋਧਣਾ, ਮਾਰਨਾ, ਕੁਟਣਾ, ਸੋਧ ਚਾੜ੍ਹਨਾ

–ਸੂਤ ਕੁ, ਵਿਸ਼ੇਸ਼ਣ : ਜਰਾ ਕੁ ਥੋੜਾ ਜੇਹਾ

–ਸੂਤ ਨਾ ਪਤਾਣ ਜੁਲਾਹਿਆਂ ਨਾਲ ਡਾਂਗੋ ਡਾਂਗੀ, ਅਖੌਤ : ਅਕਾਰਣ ਝਗੜਾ ਕਰਨ ਵਾਲੇ ਵਾਸਤੇ ਕਹਿੰਦੇ ਹਨ

–ਸੂਤ ਬੈਠਣਾ, ਮੁਹਾਵਰਾ : ਲੋਟ ਆਉਣਾ, ਫਿੱਟ ਬੈਠਣਾ

–ਸੂਤ ਭਰ, ਵਿਸ਼ੇਸ਼ਣ: ਜਰਾ ਕੁ

–ਸੂਤ ਲੜ, ਪੁਲਿੰਗ : ਖੂਹ ਵਿੱਚ ਲਟਕਾਇਆ ਲੱਕੜੀ ਦਾ ਬਾਲਾ ਜੋ ਮਾਲ੍ਹ ਨੂੰ ਬੈੜ ਤੋਂ ਉਤਰਨੋ ਰੋਕਦਾ ਹੈ।

–ਸੂਤ ਵਿਚ, ਕਿਰਿਆ ਵਿਸ਼ੇਸ਼ਣ : ਨਾਪ ਜਾਂ ਮੇਚੇ ਅੰਦਰ, ਹਿਸਾਬ ਅੰਦਰ