ਰਾਵੀ ਸਰੋਤ : ਪੰਜਾਬੀ ਸਭਿਆਚਾਰ ਸ਼ਬਦਾਵਲੀ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਰਾਵੀ (ਨਾਂ,ਇ) ਕੁੱਲੂ ਦੇ ਪਹਾੜੀ ਇਲਾਕੇ ਤੋਂ ਨਿਕਲ ਕੇ ਚੰਬਾ, ਮਾਧੋਪੁਰ ਦੇਹਰਾ ਬਾਬਾ ਨਾਨਕ, ਲਾਹੌਰ, ਮਿੰਟਗੁੰਮਰੀ ਆਦਿ ਵਿੱਚੋਂ ਵਹਿੰਦੀ ਹੋਈ ਝਨਾਂਅ ਦਰਿਆ ਨੂੰ ਮਿਲ ਜਾਣ ਵਾਲੀ ਐਰਾਵਤੀ ਨਦੀ; ਪੰਜਾਬ ਦਾ ਇਕ ਪ੍ਰਸਿੱਧ ਦਰਿਆ

ਰਾਵੀ ਸਰੋਤ : ਪੰਜਾਬੀ ਯੂਨੀਵਰਸਿਟੀ ਪੰਜਾਬੀ ਕੋਸ਼ (ਸਕੂਲ ਪੱਧਰ), ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਰਾਵੀ 1 [ਨਿਇ] ਪੰਜਾਬ ਦਾ ਇੱਕ ਪ੍ਰਸਿੱਧ ਦਰਿਆ 2 [ਵਿਸ਼ੇ] ਕਹਾਣੀ ਸੁਣਾਉਣ ਵਾਲ਼ਾ , ਰਵਾਇਤ ਕਰਨ ਵਾਲ਼ਾ

ਰਾਵੀ ਸਰੋਤ : ਸ਼੍ਰੀ ਗੁਰੂ ਗ੍ਰੰਥ ਕੋਸ਼ (ਸ਼੍ਰੀਮਹਿਤ ਪੰਡਿਤ ਗਿਆਨੀ ਹਜ਼ਾਰਾ ਸਿੰਘ ਕ੍ਰਿਤ), ਡਾ. ਬਲਬੀਰ ਸਿੰਘ ਸਾਹਿਤ ਕੇਂਦਰ, ਦੇਹਰਾਦੂਨ, ਪੰਜਾਬੀ ਯੂਨੀਵਰਸਿਟੀ

ਰਾਵੀ ਰਮਣ ਕੀਤੀ, ਆਨੰਦਿਤ ਕੀਤੀ- ਨਾਨਕ ਸਾ ਸੁਆਲਿਓ ਸੁਲਖਣੀ ਜਿ ਰਾਵੀ ਸਿਰਜਨਹਾਰਿ। ਵੇਖੋ ਰਾਵੇ।

ਰਾਵੀ ਸਰੋਤ : ਪੰਜਾਬ ਕੋਸ਼–ਜਿਲਦ ਦੂਜੀ, ਭਾਸ਼ਾ ਵਿਭਾਗ ਪੰਜਾਬ

ਰਾਵੀ : ਪੰਜਾਬ ਦਾ ਇਕ ਦਰਿਆ ਹੈ ਜੋ ਕੁੱਲੂ ਤੋਂ ਨਿਕਲਦਾ ਹੈ। ਕੁੱਲੂ ਤੋਂ ਇਹ ਚੰਬਾ ਵਾਦੀ ਹੁੰਦਾ ਹੋਇਆ ਗੁਰਦਾਸਪੁਰ ਜ਼ਿਲ੍ਹੇ ਵਿਚ ਦਾਖ਼ਲ ਹੁੰਦਾ ਹੈ। ਮਾਧੋਪੁਰ ਹੈੱਡਵਰਕਸ ਤੋਂ ਇਸ ਵਿੱਚੋਂ ਬਾਰੀ ਦੁਆਬ ਨਹਿਰ ਕੱਢੀ ਗਈ ਹੈ ਜੋ ਸਿੰਜਾਈ ਦਾ ਮਹੱਤਵਪੂਰਨ ਸਾਧਨ ਹੈ। ਇੱਥੋਂ ਇਹ ਮੈਦਾਨੀ ਚਾਲ ਵਿਚ ਵਗਦਾ ਹੈ। (ਸੰਨ 1870 ਵਿਚ ਇਸ ਵਿਚ ਹੜ੍ਹ ਆਉਣ ਨਾਲ ਡੇਰਾ ਬਾਬਾ ਨਾਨਕ ਨੇੜੇ ਗੁ. ਟਾਹਲੀ ਸਾਹਿਬ ਦਾ ਧਾਰਮਿਕ ਅਸਥਾਨ ਰੁੜ੍ਹ ਗਿਆ ਸੀ) ਫਿਰ ਇਹ ਅੰਮ੍ਰਿਤਸਰ ਤੇ ਸਿਆਲਕੋਟ ਦੇ ਦਰਮਿਆਨ ਦੱਖਣ-ਪੱਛਮ ਦੀ ਦਿਸ਼ਾ ਵਿਚ ਅੱਗੇ ਵਧਦਾ ਹੈ। ਲਾਹੌਰ ਦੇ ਨਾਲ ਦੀ  ਵਗਦਾ ਹੋਇਆ ਇਹ ਮਿੰਟਗੁਮਰੀ ਜ਼ਿਲ੍ਹੇ ਵਿਚ ਦਾਖ਼ਲ ਹੋ ਜਾਂਦਾ ਹੈ। ਅੱਗੇ ਇਹ ਮੁਲਤਾਨ ਜ਼ਿਲ੍ਹੇ ਵਿਚ ਦਾਖ਼ਲ ਹੋ ਜਾਂਦਾ ਹੈ ਅਤੇ ਆਖ਼ਿਰ ਵਿਚ ਝਨਾਂ ਵਿਚ ਮਿਲ ਜਾਂਦਾ ਹੈ। ਇਹ ਸਮੇਂ ਸਮੇਂ ਆਪਣਾ ਥੋੜ੍ਹਾ ਬਹੁਤ ਰਸਤਾ ਵੀ ਬਦਲਦਾ ਰਿਹਾ ਹੈ। ਇਸ ਦੀ ਕੁੱਲ ਲੰਬਾਈ 720 ਕਿ. ਮੀ. ਹੈ। ਪੰਜਾਬੀ ਲੋਕ-ਗੀਤਾਂ ਵਿਚ ਵੀ ਰਾਵੀ ਦਾ ਨਾਂ ਵਰਤਿਆ ਗਿਆ ਹੈ।