ਸੂਦ ਸਰੋਤ : ਪੰਜਾਬੀ ਸਭਿਆਚਾਰ ਸ਼ਬਦਾਵਲੀ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਦ (ਨਾਂ ਪੁ) ਕਰਜੇ ਵਜੋਂ ਲਈ ਰਕਮ ਦੇ ਇਵਜ਼ ਵਿੱਚ ਦਿੱਤੇ ਜਾਣ ਵਾਲੇ ਅਸਲ ਰਕਮ ਤੋਂ ਵਾਧੂ ਪੈਸੇ

ਸੂਦ ਸਰੋਤ : ਪੰਜਾਬੀ ਯੂਨੀਵਰਸਿਟੀ ਪੰਜਾਬੀ ਕੋਸ਼ (ਸਕੂਲ ਪੱਧਰ), ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਦ 1 [ਨਾਂਪੁ] ਵਿਆਜ 2 [ਨਿਪੁ] ਇੱਕ ਗੋਤ

ਸੂਦ ਸਰੋਤ : ਗੁਰੁਸ਼ਬਦ ਰਤਨਾਕਾਰ ਮਹਾਨ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਸੂਦ. ਵੈਸ਼੍ਯ ਵਰਣ ਦੀ ਇੱਕ ਜਾਤਿ। ੨ ਸੰ. सूद्. ਧਾ—ਟਪਕਣਾ। ਚੁਇਣਾ. ਪਵਿਤ੍ਰ ਕਰਨਾ. ਅਮਾਨਤ ਰੱਖਣਾ. ਘਾਉ ਕਰਨਾ. ਫੱਟਣਾ. ਬਚਨ ਦੇਣਾ. ਮਾਰਨਾ। ੩ ਸੰਗ੍ਯਾ—ਰਸੋਈਆ. ਲਾਂਗਰੀ । ੪ ਪਾਪ , ਗੁਨਾਹ। ੫ ਡਿੰਗ. ਰਸੋਈਖਾਨੇ ਦਾ ਦਾਰੋਗਾ। ੬ ਸੰ. ਸ਼ੂਦ੍ਰ. ਚੌਥਾ ਵਰਣ. “ਖਤ੍ਰੀ ਬ੍ਰਾਹਮਣ ਸੂਦ ਵੈਸ.” (ਸੂਹੀ ਮ: ੫) ੭ ਫ਼ਾ ਨਫ਼ਾ. ਲਾਭ । ੮ ਵਿਆਜ. “ਨਿਤ ਸਉਦਾ ਸੂਦ ਕੀਚੈ ਬਹੁ ਭਾਂਤਿ ਕਰ.” (ਗਉ ਮ: ੪) ਮੁਸਲਮਾਨਾਂ ਦੇ ਮਤ ਵਿੱਚ ਸੂਦ ਲੈਣਾ ਹਰਾਮ ਹੈ. ਦੇਖੋ, ਕੁਰਾਨ ਸੂਰਤ ਬਕਰ, ਆਯਤ ੨੭੫. ਹਿੰਦੂਮਤ ਵਿੱਚ ਸੂਦ ਲੈਣਾ ਵਿਧਾਨ ਹੈ. ਗੋਤਮ ਰਿਖੀ ਦੇ ਮਤ ਅਨੁਸਾਰ ਅਸਲ ਰਕਮ ਦਾ ਵੀਹਵਾਂ ਹਿੱਸਾ ਹਰ ਮਹੀਨੇ ਸੂਦ ਲੈਣਾ ਵਾਜਬ ਹੈ. ਮਨੂ ਦੇ ਹਿਸਾਬ ਨਾਲ ਗਿਣੀਏ ਤਦ ਸਵਾ ਰੁਪਯਾ ਸੈਂਕੜਾ ਮਹੀਨੇ ਪਿੱਛੇ ਬੈਠਦਾ ਹੈ. ਦੇਖੋ, ਵਿਆਜ.

ਸੂਦ ਸਰੋਤ : ਸ਼੍ਰੀ ਗੁਰੂ ਗ੍ਰੰਥ ਕੋਸ਼ (ਸ਼੍ਰੀਮਹਿਤ ਪੰਡਿਤ ਗਿਆਨੀ ਹਜ਼ਾਰਾ ਸਿੰਘ ਕ੍ਰਿਤ), ਡਾ. ਬਲਬੀਰ ਸਿੰਘ ਸਾਹਿਤ ਕੇਂਦਰ, ਦੇਹਰਾਦੂਨ, ਪੰਜਾਬੀ ਯੂਨੀਵਰਸਿਟੀ

ਸੂਦ ਸ਼ੂਦਰ- ਖਤ੍ਰੀ ਬ੍ਰਾਹਮਣ ਸੂਦ ਵੈਸ ਉਪਦੇਸੁ ਚਹੁ ਵਰਨਾ ਕਉ ਸਾਝਾ। ਵੇਖੋ ਸੂਦੁ ।

ਸੂਦ ਸਰੋਤ : ਪੰਜਾਬੀ ਵਿਸ਼ਵ ਕੋਸ਼–ਜਿਲਦ ਪੰਜਵੀਂ, ਭਾਸ਼ਾ ਵਿਭਾਗ ਪੰਜਾਬ

ਸੂਦ : ਇਹ ਇਕ ਪੁਰਾਣੀ ਹਿੰਦੂ ਜਾਤੀ ਹੈ। ਇਨ੍ਹਾਂ ਦੇ ਮੂਲ ਸਥਾਨ ਦਾ ਸਹੀ ਤੌਰ ਤੇ ਪਤਾ ਨਹੀਂ ਲਗ ਸਕਿਆ। ਕਈ ਸੂਦ ਆਪਣਾ ਮੂਲ ਸਥਾਨ ਸਰਹਿੰਦ ਦਸਦੇ ਹਨ। ਇਹ ਲੋਕ ਵਧੇਰੇ ਕਰਕੇ ਸ਼ਿਵਾਲਿਕ ਦੇ ਪਹਾੜੀ ਇਲਾਕੇ ਵਿਚ ਪਾਏ ਜਾਂਦੇ ਹਨ। ਇਸ ਤੋਂ ਇਲਾਵਾ ਇਹ ਸ਼ਿਵਾਲਕ ਦੇ ਨਾਲ ਲਗਦੇ ਜ਼ਿਲ੍ਹਿਆਂ ਵਿਚ ਅੰਮ੍ਰਿਤਸਰ ਤਕ ਵੱਸੇ ਹੋਏ ਹਨ। ਇਹ ਵਧੇਰੇ ਕਰਕੇ ਵਪਾਰ ਕਰਦੇ ਹਨ। ਸ਼ਿਵਾਲਿਕ ਦੀਆਂ ਪਹਾੜੀਆਂ ਵਿਚ ਵੱਸਣ ਵਾਲਿਆਂ ਨੂੰ ‘ਉਚਾਂਦੀਆਂ’, ਸ਼ਿਵਾਲਿਕ ਦੀਆਂ ਪਹਾੜੀਆਂ ਦੇ ਦਾਮਨ ਦੇ ਜ਼ਿਲ੍ਹਿਆਂ ਵਿਚ ਅਤੇ ਮੈਦਾਨਾਂ ਵਿਚ ਵੱਸਣ ਵਾਲਿਆਂ ਨੂੰ ‘ਨਿਚਾਂਦੀਆਂ’, ਕਿਹਾ ਜਾਂਦਾ ਹੈ। ਜਿਹੜੇ ਸੂਦ ਵਿਧਵਾ ਵਿਆਹ ਦੇ ਵਿਰੋਧੀ ਹਨ, ਉਹ ‘ਖਰੇ’ ਅਤੇ ਜੋ ਹੱਕ ਵਿਚ ਹਨ ਉਹ ‘ਗੋਲੇ’ ਜਾਂ ‘ਦੋਗਲੇ’ ਅਖਵਾਉਂਦੇ ਹਨ।

          ਹ. ਪੁ.––ਗ. ਪੰ. ਕਾ. ਟ੍ਰਾ.

ਸੂਦ ਸਰੋਤ : ਪੰਜਾਬ ਕੋਸ਼–ਜਿਲਦ ਪਹਿਲੀ, ਭਾਸ਼ਾ ਵਿਭਾਗ ਪੰਜਾਬ

ਸੂਦ  :  ਪੰਜਾਬ ਦੀਆਂ ਹੇਠਲੀਆਂ ਪਹਾੜੀਆਂ ਤੋਂ ਲੈ ਕੇ ਅੰਮ੍ਰਿਤਸਰ ਤਕ ਦੇ ਮੈਦਾਨੀ ਇਲਾਕਿਆਂ ਵਿਚ ਇਸ ਗੋਤ ਦੇ ਲੋਕ ਕਾਫ਼ੀ ਗਿਣਤੀ ਵਿਚ ਵਸਦੇ ਹਨ। ਇਨ੍ਹਾਂ ਦਾ ਅਸਲ ਸਦਰ ਮੁਕਾਮ ਲੁਧਿਆਣਾ ਅਤੇ ਨਾਲ ਲਗਦਾ ਕਸਬਾ ਮਾਛੀਵਾੜਾ ਹੈ। ਇਹ ਜ਼ਿਆਦਾਤਰ ਵਪਾਰ ਕਰਦੇ ਹਨ। ਇਹ ਜਨੇਊ ਪਹਿਨਦੇ ਹਨ ਜਿਹੜਾ ਕਿ ਛੇ ਦੀ ਥਾਂ ਤਿੰਨ ਡੋਰੀਆਂ ਦਾ ਬਣਿਆ ਹੁੰਦਾ ਹੈ। ਇਨ੍ਹਾਂ ਵਿਚੋਂ ਕਈ ਵਿਧਵਾ ਵਿਆਹ ਵੀ ਕਰਨ ਦੇ ਹਾਮੀ ਹਨ।

        ਸੂਦਾਂ ਨੂੰ ਦੋ ਸ਼੍ਰੇਣੀਆਂ ਵਿਚ ਵੰਡਿਆ ਗਿਅ ਹੈ– ਉਚਾਂਦੀਆਂ (ਪਹਾੜੀ ਇਲਾਕੇ ਵਾਲੇ ਸੂਦ) ਅਤੇ ਨਿਵਾਂਦੀਆਂ (ਮੈਦਾਨੀ ਇਲਾਕੇ ਵਾਲੇ ਸੂਦ) । ਹੁਸ਼ਿਆਰਪੁਰ ਦੇ ਕੁਝ ਸੂਦਾਂ ਦਾ ਮੁੱਢ ਸਰਹਿੰਦ ਹੈ। ਜੋ ਸੂਦ ਵਿਧਵਾ-ਸ਼ਾਦੀ ਨਹੀਂ ਕਰਦੇ ਉਨ੍ਹਾਂ ਨੂੰ ਖਾਰਾ ਅਤੇ ਦੂਸਰਿਆਂ ਨੂੰ ਗੋਲਾ, ਦੋਗਲਾ ਕਿਹਾ ਜਾਦਾ ਹੈ।

ਸੂਦ ਸਰੋਤ : ਪੰਜਾਬੀ ਕੋਸ਼ ਜਿਲਦ ਪਹਿਲੀ (ੳ ਤੋਂ ਕ)

ਸੂਦ, ਪੁਲਿੰਗ : ਹਿੰਦੂਆਂ ਦੀ ਇੱਕ ਜਾਤ

–ਸੂਦਣੀ, ਇਸਤਰੀ ਲਿੰਗ

ਸੂਦ ਸਰੋਤ : ਪੰਜਾਬੀ ਕੋਸ਼ ਜਿਲਦ ਪਹਿਲੀ (ੳ ਤੋਂ ਕ)

ਸੂਦ, (ਫ਼ਾਰਸੀ) / ਪੁਲਿੰਗ : ਬਿਆਜ, ਵਿਆਜ

–ਸੂਦਖੋਰ, ਪੁਲਿੰਗ : ਸੂਦ ਲੈਣ ਵਾਲਾ, ਕਿਸੇ ਨੂੰ ਰੁਪਈਏ ਦੇ ਕੇ ਉਨ੍ਹਾਂ ਤੇ ਬਿਆਜ ਲੈਣ ਵਾਲਾ

–ਸੂਦਖੋਰੀ, ਇਸਤਰੀ ਲਿੰਗ : ਸੂਦ ਲੈਣ ਦਾ ਭਾਵ ਜਾਂ ਕੰਮ

–ਸੂਦ ਦਰ ਸੂਦ, ਪੁਲਿੰਗ : ਹਰ ਸਾਲ ਜਾਂ ਤਿਮਾਹੀ ਛਮਾਈ ਮਗਰੋਂ ਸੂਦ ਮੂਲ ਵਿੱਚ ਜਮ੍ਹਾਂ ਹੋ ਕੇ ਜੋ ਰਕਮ ਬਣੇ ਉਹਦੇ ਤੇ ਸੂਦ ਲਗਣ ਦਾ ਭਾਵ ਬਿਆਜ-ਪੜ-ਬਿਆਜ, ਸੂਦ ਮੁਰੱਕਬ

–ਸੂਦੜੀਆ, ਵਿਸ਼ੇਸ਼ਣ / ਪੁਲਿੰਗ : ਸੂਦ ਤੇ ਰੁਪਿਆ ਦੇਣ ਵਾਲਾ, ਸੂਦਖੋਰ, ਸ਼ਾਹੂਕਾਰ

–ਸੂਦੀ, ਵਿਸ਼ੇਸ਼ਣ : ਵਿਆਜ ਤੇ ਦਿੱਤਾ ਜਾਂ ਲਿਆ ਹੋਇਆ (ਰੁਪਿਆ)