ਹਟ ਸਰੋਤ : ਗੁਰੁਸ਼ਬਦ ਰਤਨਾਕਾਰ ਮਹਾਨ ਕੋਸ਼, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ।

ਹਟ. ਹਟਣਾ ਦਾ ਅਮਰ. ਮੁੜ. ਪਰਤ। ੨ ਸੰ. हट्. ਧਾ—ਪ੍ਰਕਾਸ਼ਿਤ ਹੋਣਾ. ਚਮਕਣਾ। ੩ ਸੰ. हट्ट—ਹੱਟ. ਸੰਗ੍ਯਾ—ਦੁਕਾਨ. ਹਾਟ। ੪ ਬਾਜਾਰ. “ਦਸਚਾਰਿ ਹਟੁ ਤੁਧੁ ਸਾਜਿਆ.” (ਵਾਰ ਸ੍ਰੀ ਮ: ੪) ਇਸ ਥਾਂ ਭਾਵ ਚੌਦਾਂ ਲੋਕ ਹੈ। ੫ ਹਰਟ ਦਾ ਸੰਖੇਪ. ਦੇਖੋ, ਹਟਮਾਲ.

ਹਟ ਸਰੋਤ : ਸ਼੍ਰੀ ਗੁਰੂ ਗ੍ਰੰਥ ਕੋਸ਼ (ਸ਼੍ਰੀਮਹਿਤ ਪੰਡਿਤ ਗਿਆਨੀ ਹਜ਼ਾਰਾ ਸਿੰਘ ਕ੍ਰਿਤ), ਡਾ. ਬਲਬੀਰ ਸਿੰਘ ਸਾਹਿਤ ਕੇਂਦਰ, ਦੇਹਰਾਦੂਨ, ਪੰਜਾਬੀ ਯੂਨੀਵਰਸਿਟੀ

ਹਟ (ਸੰ.। ਸੰਸਕ੍ਰਿਤ ਹਟ੍ਟ=ਮੰਡੀ) ੧. ਦੁਕਾਨ। ਯਥਾ-‘ਹਾਣੁ ਹਟੁ ਕਰਿ ਆਰਜਾ ਸਚੁ ਨਾਮੁ ਕਰਿ ਵਥੁ’ ਉਮਰ ਨੂੰ (ਹਾਣ) ਖੀਣ ਭਾਵ ਨਾਸ਼ ਹੁੰਦੀ ਜਾਣਨਾ ਇਹ ਦੁਕਾਨ ਕਰ ਤੇ ਸੱਚਾ ਨਾਮ ਇਹ ਵਸਤੁ (ਦੁਕਾਨ) ਵਿਚ ਪਾ।

੨. (ਪੰਜਾਬੀ ਹਟਣਾ) ਰੁਕ ।

੩. ਹੱਟ ਭਾਵ ਲੋਕ। ਯਥਾ-‘ਦਸ ਚਾਰਿ ਹਟ ਤੁਧੁ ਸਾਜਿਆ’ ਭਾਵ ੧੪ ਲੋਕ ਤੈਨੇ ਸਾਜੇ।