ਰਾਮ ਨਰਾਇਣ ਸਿੰਘ ਦਰਦੀ ਸਰੋਤ : ਪੰਜਾਬੀ ਸਟੇਜੀ ਕਾਵਿ, ਸਰੂਪ, ਸਿਧਾਂਤ ਤੇ ਸਥਿਤੀ, ਪਬਲੀਕੇਸ਼ਨ ਬਿਊਰੋ, ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ

ਰਾਮ ਨਰਾਇਣ ਸਿੰਘ ਦਰਦੀ ਦਾ ਜਨਮ 4 ਦਸੰਬਰ, 1919 ਨੂੰ ਮੋਹਰੀ ਰਾਮ ਦੇ ਘਰ ਚੱਕ 286, ਲਾਇਲਪੁਰ ਵਿਖੇ ਹੋਇਆ। ਪੰਜਾਬੀ ਅਧਿਆਪਨ ਕੀਤਾ ਅਤੇ ਪ੍ਰਿੰਸੀਪਲ ਵੀ ਰਹੇ। ਵੰਡ ਤੋਂ ਬਾਅਦ ਲੁਧਿਆਣੇ ਰਹਿੰਦੇ ਸਨ। 1994 ਵਿਚ ਮੌਤ ਹੋਈ। ਉਨ੍ਹਾਂ ਦੀਆਂ ਪੁਸਤਕਾਂ ਸ਼ੁੱਧੀ ਦਾ ਰਸਤਾ(1943), ਅਨੋਖਾ ਇਸ਼ਕ (1945), ਅਣਖੀ ਜਵਾਨੀ (1955), ਵਾਰਾਂ ਮੇਜਰ ਭੁਪਿੰਦਰ ਸਿੰਘ (1968), ਰਾਵੀ ਦਾ ਦੇਸ਼ (1969), ਵਾਰ ਮਹਿੰਦਰ ਸਿੰਘ ਰਣੀਆਂ ਵਾਲੇ ਦੀ (1970), ਗੋਆ ਦਾ ਜੇਤੂ ਮੇਜਰ ਸ਼ਿਵਦੇਵ ਸਿੰਘ (1972), ਨਾਲ ਪਿਆਰੇ ਨੇਹੁ (1972), ਸੀਸ ਦੀਆ ਪਰੁ ਸਿਰਰ ਨ ਦੀਆ (1975), ਇਸ਼ਕ ਅਸਾਂ ਕੂ ਲੋਰੀਆਂ ਦਿੱਤੀਆਂ (1977) ਛਪੀਆਂ ਹਨ। ਉਹ ਬਿਆਨੀਆ ਕਾਵਿ ਦੇ ਮਾਹਰ ਸਨ। ਉਨ੍ਹਾਂ ਮੁੱਖ ਰੂਪ ਵਿਚ ਵਾਰਾਂ ਲਿਖੀਆਂ ਹਨ, ਵਾਰਾਂ ਤੋਂ ਇਲਾਵਾ ਕਵਿਤਾਵਾਂ, ਮਹਾਕਾਵਿ ਅਤੇ ਦੋਹੜੇ ਵੀ ਲਿਖੇ ਹਨ। ਉਨ੍ਹਾਂ ਦੀ ਇਕ ਹੋਰ ਖਾਸੀਅਤ ਲਹਿੰਦੀ ਉਪਭਾਸ਼ਾ ਵਿਚ ਲਿਖਣਾ ਵੀ ਸੀ।